雞大哥泰國海南雞 (已結業)

小店位於油麻地地鐵站出面，顧名思義主打泰國海南雞，除此之外亦有芒果糯米飯同其他嘅特色嘢飲，放工後唔想煮飯嘅話呢度都係個唔錯嘅選擇呀～ 一場嚟到冇理由唔叫呢度嘅招牌菜，海南雞生熟度啱啱好，油香四溢，皮爽肉滑，無骨啖啖肉，配上酸辣醬令到雞嘅鮮味更加突出～ 油飯濃香但食落唔膩，幾有驚喜😛小食有花膠碗仔翅，會話相當足料，因為每一啖都食到滿滿嘅配菜，花膠淋滑，增加滋補功效，整體口感濃稠，膠質黏嘴，黏黏韌韌，滿足😌 而甜品有經典嘅香蕉煎餅，即叫即整熱辣辣，表面煎至香脆，中間有香蕉蓉同時帶點煙韌感，上面搽滿nutella同煉奶，真係好邪惡呀🥺呢度嘅飲品都有幾多選擇，芒果沙冰味道濃郁，勝在唔太甜亦唔會有種假芒果嘅調劑味～ 泰國奶茶沙冰都好唔錯，平時應該係配仙草嘅，但店員私心推介配紅豆，所以決定試一試，果然無介紹錯，奶茶香濃，大大粒紅豆又唔硬，正！