龍如酒家

營業中

休息中

今日特意走入流浮山買金蠔，順便去食海鮮。原本諗住去海灣試吓，點知無開門，所以就揀咗去對面間龍如。入去時見唔太多人，心諗唔知點唔點，但勝在地方非常乾淨，而且枱與枱之間亦闊落，都坐得幾舒服。去門口揀咗幾款海鮮，伙記即時送去廚房煮，不到15分鐘就已經逐樣上枱，較率幾高。餐前還送兩碗海鮮湯，個人覺得送得不夠大方，流浮山亦食過幾家飯店，一般送海鮮湯係會一大湯碗上，但呢家只送兩小碗，感覺有點吝嗇。豉油王蝦 : 炸得香脆，但不會蓋過蝦嘅鮮味，食落口帶有微微脆香。豉椒蟶子皇 : 肉嫰多汁，不會煮得過老，味道剛好，不太鹹。炆斑腩 : 伙記話係得獎名菜，推薦我們一試。一般炆斑腩都會用到支竹火腩去炆，但呢度師傅做法係先微炸再炆煮，醬汁濃而不會失咗魚嘅鮮味，果然名不虛傳。砵酒焗蠔 : 味道雖然可以，但實在食落有點膩，可能兩個人份量實在太多。油鹽水浸菜芯 : 呢個反而係全餐最唔好食，有點過鹹。飯後還有免費水果及甜點。