Mimila (已結業)

在沙田新城巿廣場搵食，見到呢間馬來西亞餐廳都幾靚仔，即管入去試下。餐廳地方不大，但尚算坐得舒適。我見隔離個枱6個人一口氣叫左6碗A1馬來辣蝦湯面，咁一定好好味，我都湊下熱鬧叫返碗先，整多個參巴醬炸魚旦，一杯檸檬薏米水同貓山王芝士蛋糕做個甜品。辣蝦湯面湯頭好清甜，但有好濃嘅蝦味，但不會係味精嘅味道，飲完一口都無口乾嘅感覺。檸檬薏米水好伏，根本就係薏米加糖水，D水都無薏米味，仲要收我32蚊。貓山王芝士蛋糕好得，好濃嘅D24味道，但又有芝士蛋糕嘅口感，食落去唔會好甜，無好膩嘅感覺。魚旦一共6粒，食左一半先記得影相，魚旦勁大粒，好彈牙，唔會好似街邊魚旦咁只係得麵粉味，參巴醬好特別，有小小似豆瓣醬，但唔會好辣，配起魚旦非常合，唔會完全蓋過魚旦本身嘅味道。