S2 Kitchen (已搬遷) 新店位置

父親節去過S2鐵板燒慶祝，最近去仲見到有海膽杯盛宴menu（二人份 $1888），有11道菜，當中不少都係以海膽入饌，非常豐富！沙律：蟹肉黑醋沙律杯（2份）有番茄、豆腐、車厘茄同埋蟹肉，不過配搭就好似各有各咁，唔算驚喜。北海道三點刺身 （2份）三款刺身包括三文魚、甜蝦及北寄貝，質素不過不失，可能係刺身雪得太凍，略為影響味道。十層海膽杯（2杯mini）記得好多年前食過S2 Kitchen嘅海膽杯，非常回味，估唔到今次喺S2鐵板燒都有得encore！海膽杯整成mini版，但滋味依然。十層分別係白飯魚脆片、黑魚子、海膽、海葡萄、白蝦、三文魚籽、吞拿魚蓉、蟹肉、海膽同最底嘅海帶，海膽鮮甜味美，配合不同嘅食料，令味道更有層次，口感亦更加豐富!蟹粉甲羅燒海膽杯（1隻）食完海膽杯意猶未盡，呢個甲羅燒就嚟得剛剛好啦。甲羅燒材料矜貴，放有大量蟹肉、三文魚籽、黑魚子、海葡萄，仲有慷慨嘅海膽！撈埋一齊食，可以食到唔同嘅鮮味，既有海膽嘅甜，又有魚籽鹹香，仲有海葡萄獨有嘅味道，好有層次！海膽焗原條海參（二人份）非常驚喜嘅一道菜！海參口感爽滑，但本身味道較淡，秘製海膽汁令到鮮味更加突出，個汁好味到我忍不住清碟呢！