日日涮 (已結業)

嚟到旺角，由於女朋友仔好鍾意食火鍋，又好似食刺身喎，所以嚟講我哋就喺旺角入邊揀咗間餐廳，可以滿足曬兩個願望。今次我哋揀咗特級美國肥牛火鍋，在額外加咗30蚊要任食刺身。湯底要咗昆布同埋番茄。昆布湯底味道好出，而且偏甜，番茄湯底就普普通通啦。首先係任食嘅肥牛，唔知係咪我哋揀左最低級嗰隻肥牛，真係一般般，睇圖片都見到肥肉比例都幾多下，食落都還好啦，所以我哋只係食咗一碟。另外佢仲有豬肉同雞肉嘅，打完豬肉比牛肉更加好食，冇乜肥肉之餘仲好嫩滑，所以我哋叫加多咗啲豬肉嚟食。第二個重點嚟喇，就係海鮮拼盤。有龍蝦，鮑魚，扇貝，海蝦，蟶子，青口，蟹等等。當然，任食放題嘅海鮮嘅質素都唔可以有太高嘅期望，不過老實講，200幾蚊有海鮮食都算唔錯個喇。跟住到刺身喇。刺身嘅質素真係有啲參差。餐廳會先畀咗一杯是日推介嘅刺身，入邊啲刺身係正常嘅放題水平，三文魚，希靈魚，墨魚片等等。不過加單嘅時候噩夢就嚟喇，我哋叫咗吞拿魚，吞拿魚好多根，真係你唔會想夾第二件嚟食。丸類蔬菜等等可以出邊攞嘅，我就唔過別講喇。最後餐廳有甜品櫃，款式都幾多，雖然質素平平，冇乜邊件特別好食或深刻，但放題嚟講我都覺得有交待嘅。