僕之拉麺 (已搬遷) 新店位置

原本諗起去嗰間一向坐落呢個位嘅拉麵鋪食個麵。我想去之前確定唔會去到人哋落緊場，所以想喺open rice搵吓佢個lunch break係幾點。因為唔記得個名，喺open rice搵深水埗日本菜。但搵唔到。已經覺得怪。但我照去，因為越諗越搵越想食。亦因為咁，所以寫呢篇文。一去到，見到同一鋪位，裝修冇變，音樂冇變，食具冇變。但鋪名同埋啲拉麵相唔同咗，先知道已經轉咗手。咁我當然照叫個拉麵食。我揀咗濃湯拉麵，加細露筍，加黑芝麻油，加炙叉燒，加味蛋。拉麵到，望落幾好。食完之後最強烈嘅感覺係，「可唔可以唔好用個鋪位呃啲人嚟幫襯你呀？」湯：一飲落去，即刻飲到除咗豬骨湯味，仲有水喉水味，即係喺屋企冇過濾冇煲過嘅水嗰種怪味。口感上，湯底唔夠濃，佢嘅黏度只係來自後加嘅油脂，而唔係濃到好似啲骨髓溶哂嘅感覺。好似啲豬骨湯本身冇用足夠嘅豬骨或者用啲冇咁有骨髓嘅骨或者煲唔夠時間咁 😒麵：好重鹼水味，有少少煮耐咗，唔夠彈牙。細露筍：寫得細(佢哋個名唔係用呢個字，但我唔記得佢用乜)，就預咗好幼。但我估唔到個尾位會有渣。我逐條食，6-7條之中只有一條冇渣。黑芝麻油：我食唔到亦聞唔到。如果唔係黑色，我會以為啲油脂溶咗啲。