有蒸氣 海鮮石鍋專門店 (已結業)

想減肥食清啲，同事介紹去食蒸氣粥底石鍋，主要係食海鮮，冇加油健康D。今次去食佢最平嗰個套餐$328一位去到見到佢有個著名嘅黑松露燉蛋要加$28 ，見佢咁出名就試吓啦。佢所有嘢都係即刻起我哋面前個蒸籠度蒸嘅一枱一爐。兩碗蒸水蛋就擺喺我哋面前大約幾分鐘後店員就幫我地攞出嚟又真係整得好靚好滑，小小嘅黑松露味道帶香咗佢加上少少豉油咁就Perfect啦。跟住店員就幫我地整沙包蜆同埋鮑魚啦，每人有兩粒，都幾大粒。個鮑魚就細細隻上邊仲界咗花，放咗少少蟲草花一齊蒸，沙包蜆味道鮮有啲海水味，個鮑魚就整得啱啱好。跟住就係海中蝦同埋日本元貝，估唔到正嘅海蝦比起平時白灼嘅好食好多，日本元貝好大粒但係就似乎蒸耐左少少美國筒號大大隻就咁放起個蒸架上邊佢嘅蠔汁就流晒落去個粥度。豬肉丸同墨魚丸要蒸得比較耐，墨魚丸好彈牙。每樣得一粒有少少唔夠喉薑蔥蒸鮮魷同埋勝瓜，味道比較清淡勝瓜都幾鮮甜最後就係期待左咁耐嘅粥底啦，有生米開始煮成嘅粥味道清淡得來有啲鮮味。整體份量唔多但係都幾好食。