野玩田店 (已搬遷) 新店位置

喺K11入邊搵嘢食，估唔到依間喺角落入邊，但入邊都仍然有好大嘅空間，坐得好舒適。燈光好溫暖，店員服務態度唔錯，餐牌上面亦都有好多嘅選擇。餐包個麵包超軟熟，亦都感覺好新鮮，熱熱地非常之高質。當日我哋食咗黑芝麻包同埋蜜糖包，兩個都令人好想再食多一個🤩🥺芝士磨菇釀雞翼雞翼用雞中翼同雞翼尖，香脆可口。芝士蘑菇同雞肉零違和感，味道十分匹配。而且，雞翼已起骨，啖啖都係焦脆雞皮同芝士蘑菇同雞肉，外脆內軟，令人欲罷不能，4隻好似好少，但令你更加記得佢嘅味道。煙三文魚大蝦沙律佢個汁係青檸醋，酸酸地，相當清新絕對唔會有沙律醬嘅油膩感。同時材料亦都好新鮮，但係美中不足嘅係大蝦完全冇調味，亦都食唔出蝦嘅鮮味。日本頂級帶子蕃茄汁意大利飯4片帶子都煎得好香，味道鮮甜，意大利飯軟硬適中，每粒飯都被湯包圍住，濕潤度剛好，味道香濃卻不膩，但帶子份量偏少。蘋果批賣相精緻，打卡一流。鍾意蘋果批嘅清甜味，配上雲呢嗱雪糕，依個甜品絕對滿分。