碗屋 (已結業)

約咗愛人行中環，大家都未食飯又見到呢間嘢喺面前就衝上去試下咁話啦。店舖嘅職員服務態度非常好。既有禮貌又肯幫忙。仲好主動話畀客人聽1點前離坐有折用現金或八達通畀錢又有折咁就坐低食啦。本身見到佢有放題都有啲興趣想試下但係望到咁多腐皮就唔係好夠膽畀咁多次去試。既然都入到嚟就試下佢嘅刺身套餐同鰻魚飯套餐啦。刺身套餐首先上咗喺個沙律同埋中華冷麵。中華拉麵偏酸，個沙律都係偏酸。有啲人就會覺得咁食得沙律中華冷麵梗係酸㗎喇。要留意，我講得出係偏酸梗係比正常嘅酸更偏酸。然後到個刺身上，不得了。全部都非常清淡，啖啖滋味淡如水。不過值得欣賞係師傅嘅刀工。輪到個鰻魚飯套餐，唔知個鰻魚係自己燒定點啦總之我就總係食起上嚟就係買返嚟返熱。最有驚喜係佢個麵豉湯，甜身。有趣有趣。咁樣食一食有個折兩個人兩個餐落樓都唔使$400。仲要送多張優惠券畀你。