Oh Food 清真阿拉伯料理 (已結業)

有一段時間無幫襯過呢間中東餐廳，今次外牆無再掛敍利亞三色旗，時間真係唔會停留。無黎一排，餐牌加左價，無左$65平價午餐，統一$80，而且$80餐無左頭盆，另外多左$200高級餐，但係羊架同三文魚扒睇黎無乜中東特色喎。今日試左：是日精選：烤雞腿飯。一大隻𠩤隻雞脾切開幾份，淋左酸酸地既肉汁，點會唔好味，雞肉好嫰滑，味道豐富，睇黎係燘過，居然無乜香料味，可以食到雞既𠩤味。配菜燘薯塊就太鹹，有d失敗。烤羊肉絲配芝麻醬及香蒜醬。香蒜汁無乜特別，芝麻醬係有芝麻味既沙律醬，可以中和下bbq羊肉既熱氣，又同羶羶地既羊肉好夾，羊肉羶味較重，但係羶得好味。烤過既羊肉仲有肉汁，肉質嫰滑。今次個飯終於可以加底，唔駛加錢，睇黎老板都發覺到之前個飯太細。飯既配方都改左，無左黃薑味同提子乾，味道唔係好形容到，好似有落小小蒜蓉，總體黎講係清淡過以前，更易接受。飲品點左凍阿拉伯奶茶同熱豆蔻紅茶。凍奶茶進步左好多，有番d茶味，仲好似落左豆蔻，味道香甜，係好有特色既加料奶茶。熱豆蔻紅茶就比較清淡，感覺可以消滯。再之後上黎，店員話我成日黎，已經認得我，就送左張VIP九折卡！