1仔冰室 (已結業)

有感好耐無同班行家聚一聚，update 下市場最新狀況，尋晚ad hoc call 飯局，大家分佈港九新界，最好就搵個中心點方便大家。尖咀好多餐廳唔坐得耐，又貴夾唔飽。Search 到紅磡有間新開冰室就決定試下約呢度，話晒東西鐵總站，又係巴士總站。夜走都有的士，最0岩第2日要返工又想聚下呻下嘅飯聚。天氣麻麻，我就懶行，紅磡火車站$24蚊的士去到門口，方便又affordable。可能我早啦，一入去無咩人就揀咗張大枱，都幾光猛同乾淨。要讚一讚厠所幾衛生，不過就窄咗少少。我地一行6人，個個志在吹水，所以都無點太多嘢。因為早，好好彩食到佢地龍蝦鮑魚蒸飯，D 飯蛋白炒底，好有心機，上面鮑魚用陳皮蒸，龍蝦就加咗大量蒜蓉，D 鮮味落晒D飯度，好惹味！男士要啤一啤，所以就點咗好送酒嘅椒鹽鮮魷。外脆內軟，唔老，火喉控制得好好。少少辣係幾開胃。呢間冰室肉餅都幾多款，好少冰室咁多選擇，我地就點咗潮式的，食得出手刴，好家常，感覺好屋企(可惜掛住食無影)。我地都另外加多兩碟菜，好夠鑊氣。