六味屋

營業中

休息中

睇雜誌見到呢間拉麵店，本身都中意食拉麵，於是特登過太古試吓。佢喺太古城附近，位置都算就腳。晚飯時間去食，唔算太多人，唔洗等位，職員態度都OK。見到佢期間限定係白味噌拉麵，但有啲想試唐辛子鹽味拉麵，所以最終嗌咗唐辛子拉麵，朋友就嗌咗個檸檬鯛魚湯拉麵。因為肚餓嗌多咗五隻餃子，最後加單要多咗一碗白味噌拉麵。先講餃子，好失望，皮硬唔脆，又唔夠味，完全唔建議嗌嚟食。再講下拉麵，唐辛子拉麵幾好食，比想像中辣，同鹽味湯幾夾，兩片慢煮雞幾淋，唔會鞋口，可惜拉麵冇得揀軟硬度，個人覺得個面偏淋，扣咗啲分。檸檬鯛魚湯拉麵酸酸地幾開胃，不過唔係好飲得出個魚味，但整體都算幾好。我將朋友碗拉麵嘅檸檬加咗落去唐辛子拉麵，個人覺得加啲檸檬再開胃啲又中和返啲辣，如果本身唐辛子拉麵有檸檬版都幾好 至於個白味噌拉麵就真係冇特別，純粹係因為唔夠飽先再嗌。 整體嚟講都會想再食佢嘅獨特拉麵湯底，其他普通湯底覺得可以唔嗌都得，小食就免啦。