福川鐵板燒日本料理 (已結業)

餐廳分刺身壽司及鐵板燒廚師發板，我地揀左$1288 Omakase。十分期待。前菜來了胡麻豆腐，凍凍地，胡麻味又白又濃，加添豆腐香。接著付上南瓜凍湯，凍湯顏色是燈黃色，南瓜味突出。小番茄都好講究，有金箔在面上，幾有高貴感。師傅話呢個時候最啱食早秋刀刺身，平時食開燒秋刀魚，今次食刺身感覺好特別。跟住有好戲睇，師傅用煙燻整煙燻鰹魚，有好香嘅煙熏味。睇得又食得。磯煮鮑魚，我好鍾意食，味道幾正。然後再上煮物，有茄子及蝦，味道清清淡淡，仲有個明太子芋包，入面充滿明太子，小小辣辣地。到我最鍾意食嘅壽司上場了金目鯛、赤血引、胡麻醬油甘魚、碎魷魚、巨型帶子、海螺壽司及醬油拖羅，全部都非常新鮮，高質壽司。燒物有占魚，幾香而且幾肥美。估唔到仲有迷你海膽飯，師傅仲俾埋紫菜可以夾住食。仲有海綿雞蛋，軟綿綿幾香蛋味。再來魚湯，清甜。最後有日本蜜瓜及提子，好甜。