616牛肉火鍋專門店 (錦榮街) (已結業)

要揀一間專門食牛既打邊爐，第一下諗到既都相信係616火鍋專門店，今晚去左新蒲崗呢間分店認真唔錯，首先值得一提係呢間分店個環境真係幾好，新淨又乾淨又夠光猛，最靚最吸引到我既係餐廳果兩幅璧畫，係兩幅好令人懷念既九龍城風景，畫得好靚令我好掛住仲有飛機飛過既九龍城日子。今次揀左牛雜湯底，牛雜個份量真係超多，真係食到尾都未食完，湯底又夠味，淨係呢個湯底都超值。黎得616梗係要狂叫唔同種類既牛，有加埋蛋一齊食既勁滑滑尾龍，肉味又濃又滑。花雕醉牛有驚喜，淥完都仲有陣花雕味，好香好好味。肩胛翼板牛味勁重，同安格斯橫隔肌差唔多。牛朴肉同埋重點要試既信州和牛肩胛就偏向油脂味重入口即溶。麻辣牛肉餃就辣辣地勁惹味，最後加埋個鮮製手打烏冬，估唔到個烏冬都好滑好正，616整體上實在高質。