潮聖 (已結業)

剛響「熟食年宵」食完潮汕牛肉餅，所以好想找其他食肆再食回味一下，剛巧見到飲食雜誌訪問呢間「潮聖」老闆，一個八十後的年青人，令顧客可品嚐他的家鄉菜。而且附近過條天橋就到「南豐紗廠」呢個活化景點，所以特登去荃灣試下呢間小店兼行下紗廠。因5:00 去到可叫下午茶餐（2:30-5:30）先叫我期待的招牌手打牛肉餅米粉$23，再叫正宗豬手飯$35，兩個都包飲品，叫了凍奶茶同凍檸茶。再響隔離鋪位坐，有張二人枱同吧位枱。牛肉餅有6塊，好彈牙呀！牛肉味都好香。係我想食的味道，真係好少店有牛肉餅食，仲要係自製手打的，讚呀。如果用一串串賣比學生，可能成為受歡迎的街頭小食。而米粉份量都多，不過個湯底就冇咩味。但呢個價錢$23已非常超值。另外正宗豬手飯餐$33超大碗，又淋又多肉，仲有隻半生熟蛋同生菜，咸酸菜，好有誠意的菜色。豬手帶咸味，可能用滷水，又好似唔係用南乳整。再單點潮聖石磨腸粉$23，有蝦乾、菜脯、豬肉碎、魷魚乾同蛋來包的腸粉，口感都好滑。荃灣小店推介，有口福喇，支持小店。