K-Pop snack (已結業)

阿妹喺火炭番工，話成日同同事嚟呢度食LUNCH，抵食又好味。講左幾次，我終於搵到個星期六同佢一齊去試。四款無限添加嘅前菜無骨甜辣炸雞拼年糕 $139正常份量，炸雞唔脆，但有肉汁；雖然叫甜辣，但齋甜唔辣；年糕炸過再撈醬，外層有少少焦硬，內層煙韌，我妹最中意食佢。海鮮蔥花餅 $90煎餅賣相幾靚，而且好厚、外圈煎到脆口、急凍海鮮以魷魚為主，份量幾多。不過對於經常煮韓食嘅我嚟講，呢個餅一般😅。急凍海鮮無海鮮味、蔥無煎出香氣、雖然好厚好靚，但粉感重。牛肋骨鍋(細) $120牛肋骨有4件，大細不一；牛肉好易齒開，醬汁好甜(糖嘅甜)，食多幾啖更會覺得鹹，送飯殺手😏 另有白蘿蔔、甘筍。海鮮炸醬麵 $127海鮮有魷魚、大蝦、蜆仔、青口，都係急凍野，所以稱唔上鮮。春醬本身有肉碎、同洋蔥，配料仲有椰菜絲、青瓜絲、甘筍絲、洋蔥絲。無論海鮮定配料都好豐富，不過略嫌麵條有D碎濕濕。呢個一定要同人Share，除左因為大份之外，重點係好油，好快滯。原來星期六日有加一，餐牌價錢亦會唔同，另外可以食完先去埋單，有別於平日先埋單後食嘅做法。最後，埋單果陣記得check單，因為當日炸雞同炸醬麵各收多我$25🙉，好彩自己有計單