三希樓 (已結業)

睇openrice搵下港島區有咩川菜好食，而呢間三希樓都幾多好評，似乎都幾正宗好食。裝修仲好別致，好有氣派！侍應先送上茶水，茶味幾香。餐牌除左main menu，仲有夏日推薦既新菜式。有豆腐乾同涼拌海帶作為前菜，涼拌海帶有少少辣，不過好開胃。而沙拉鮮筍，口感好清新，好脆，酸酸甜甜，好似食緊蘋果沙律咁，非常開胃。蜂蜜蕃茄，表面撒上桂花，每片蕃茄都點滿蜂蜜，食落好香花味同甜味。水煮魚採用既係桂花魚，魚肉非常嫩滑，入口麻辣但唔油膩，而且有好多配料，包括青瓜、鴨血、薯粉、筍和芽菜等，食落相當有層次感。之後既係三椒豬手，豬手好入味，去左骨切成一粒粒炒，除左辣味仲有花椒香味，越食越辣，不過好好送飯。熗炒蒿筍絲，食到停唔到口，爽脆既蒿筍絲，微辣之餘，有點咸香，同蒿筍絲好夾。最後仲有個甜品，係棗茸千層糕，比較重紅棗味，煙煙韌韌唔會太甜。