隼 (已結業)

今日去咗MegaBox睇完傢俬之後就要去搵食， 小朋友話想食壽司，其實呢個商場都幾多選擇，不過有一間係火車壽司，又唔係大品牌嗰間，一於去試吓。餐廳非常光猛，感覺好乾淨同清新， so far出產都快，講講嘢食先。壽司款式非常之多，基本上想食嘅魚生都有，無論係傳統嘅軍艦，或者創意加芝士炙燒嘅都有。反而最有驚喜嘅，竟然係我個仔嗌咗嗰碗牛肉烏冬，佢個湯底非常之濃郁，牛肉亦都唔吝嗇，搞到爸爸都要嗌多碗自己再食。魚生方面，新鮮唔在講，仲要係厚切，性價比極高。而炸蝦卷上面鋪相厚厚嘅芝士，加埋火彈一彈，一旦擺落口，唔同層次嘅感覺都出晒嚟。嗰日我哋禮拜六去，都見到小朋友喺呢個商場買完玩完，就去呢度醫肚，宏觀來講，都係一間幾啱親子嚟嘅餐廳。