喜運點心專門店 (已結業)

一直都好鍾意飲茶，但平日要返工又唔想咁早起身，所以都冇乜機會去飲。最近搬咗去石門發現原來嗰度有一間點心專門店咁就啱晒遲起身嘅我。呢間點心專門店嘅位置好方便就係馬鐵站一出既A出口，所以好容易搵到！果日同我媽咪10點幾到，餐廳都唔係太多人，而且環境舒服，裝修好有中國特色。食物種類同酒樓嘅差唔多，甚至有啲特色啲嘅小食！因為我都係第一次嚟所以想試吓佢啲嘢好唔好食 所以嗌左幾樣試試，我哋嗌左招牌米網海鮮滑腸粉，鮮蝦燒賣王同埋樓面姐姐推介嘅雞粒鹹水角。腸粉皮好滑同埋第一次試有米網既腸粉，好新奇而且佢都有幾多海鮮，唔係剩係得一兩粒Hea你。至於個燒賣入邊嘅蝦乾係爽同新鮮，不愧為佢哋嘅招牌，想再encore多碟。而鹹水角同平時食開嘅唔同佢特別有雞粒喺度所以令到成個鹹水角嘅味道提升咗！總括今次喺度食嘢體驗環境舒服，侍應服務幾好，價錢同埋嘢食嘅性價比都幾高，茶錢亦都好平。所以我得閒嘅時候，又想飲茶都會嚟返呢間！