81番 (已結業)

到咗晚餐時間都唔知食咩，去到朗豪坊見到依間無乜人，就同友人坐低咗。睇下menu有日文，原來係日本餐。帶有少少期待order咗脆辣炸雞咖哩飯，豬軟骨烏冬，同明太子意粉。加錢要咗幾杯特色飲品，伏就是這樣開始。飲品大半杯都係冰，我嗰杯士多啤梨奶昔尚算正常，友人嗰杯個味直程可以用奇特黎形容，夠曬特色。由於佢無水提供，咩味都好啦我都好快飲曬。然後侍應端上了豬軟骨烏冬餐。個麵豉湯少到我以為係人地飲剩，忍唔住問個侍應係咪拎過黎時倒瀉咗，佢尷尷尬尬咁拎返個湯入去，但又拎返同一碗湯出黎，話我知: 廚師話每碗湯都係得一舀架咋。我呆咗，其實佢可以買個大d既舀，或者換個細d既碗，咁件事會無咁核突。隨餐仲有一舊腐皮壽司，凍冰冰好難食。食到依度咩期待都無曬啦，但驚嚇陸續有黎。炸雞飯舊雞介乎喺燶同未燶中間，咖哩係無咖哩味，加埋一pat疑似配菜真係同頹飯無分別。不過係貴價頹飯。戲肉黎喇，明太子意粉。又一pat類似廚餘既物體。碎濕濕既意粉捲埋一堆，入面加咗d酸瓜同菇同明太子。可能因為個碟太大，佢地放埋個餐包同牛油喺同一個碟度，頹飯代表作。個包又係凍冰冰，扮餐包又嫌佢無甜味，扮豬仔包又嫌佢侮辱咗豬仔包。一句到尾，性價比低