3rd Space (已結業)

舖頭細細，有10幾個位，木系裝修好啱打卡，係位置偏僻啲。星期六三點左右去食下午茶，當時人唔多，店員告知60分鐘用餐時間、最低消費$90。聽到60分鐘用餐我已經呆一呆，仲要係非繁忙時間都有用餐時間。坐低認真睇吓餐牌，發覺一個班戟$85(未加一)，換言之好大機會單叫班戟要叫杯嘢飲。*24小時浸煮鮮豚肉角煮慢煮蛋穀米茶漬飯 $120角煮豚肉係厚片豬五花，有三大片，帶超濃醬油香，肉質軟腍，瘦肉肥肉半半，入口唔會過油。溫泉蛋煮到啱啱好，滑嫩流心。茶漬飯當然要有茶同飯，飯偏硬，米香略淡，自己將茶倒入飯碗，茶味淡又唔香，完全俾醬汁香掩蓋咗。招牌燒海鹽忌廉麻糬班戟 $85班戟有好多味道可以揀，我揀咗伯爵茶。班戟厚身，質感介乎日式梳乎厘班戟同美式班戟之間，有啲份量但唔會覺得厚實，size偏細，單食班戟茶味偏淡，配埋其他配料水果就會食唔到茶味。中間有黑糖麻糬，少少甜，煙韌得嚟唔會似鼻涕嘅質地，面頭仲有少少吉士醬，帶蛋香但偏甜。北海道牛奶雪糕溶得好快，奶味香濃，配熱班戟一流，但奶味會掩蓋班戟茶味。