Cafe首爾

營業中

休息中

見佢晚晚爆場，好奇心發作，晏晝收工經過試試啦，但有點浪得虛名！舖面好細，坐得唔舒服。大豆芽爽甜，幾吓比我食晒。泡菜還可以啦，微辣微酸，但似乎咸左少少，撈飯較為合適。韓式煎餃子，其實真係無咩味道，唔知食緊咩，唔難食，一試無妨。烤牛肉湯麵，其實係肥牛辛辣麵！甘筍同椰菜我都唔食既，湯底淡如水，麵質還可以接受，烚肥牛味道質感正常合格，唔覺有烤過囉。賣相求其而凌亂不堪入目，您估依家係自己屋企煮麵比自己食咩！掉啲肥牛配菜炒埋一碟就咁上枱，好野！茶餐廳食個餐蛋麵都靚過您呀！韓式炸醬麵，係電視見過，食就第一次，感覺似麵豉醬撈烏冬麵囉。味道好寡、低沉、單調，我寧願食潮式炸醬麵。白白既麵條，口感同外觀似足烏冬，口感一流，滑溜嚥韌彈牙，超正！係味道差啲。試吓韓式梨汁先，唓！只係罐裝果汁，無咩特別。有機會再試多次，我想試石頭飯同蔘雞湯呢。