和牛燒肉一郎 (新都城中心二期) (已結業)

行過見到新開燒肉店，好大隻牛好吸引，未開已經有好多人等緊位，但係餐廳環境好大，所以我哋好快已經等到位。我哋揀咗套餐B，特選美國牛肉放題，食物種類都有好多，有齊牛肉、豬肉、雞肉、海鮮、其他熟食同甜品雪糕等等，90分鐘放題，時間都算充足。特別推介牛肋肉：脂肪比例好，好有牛味，有入口即溶嘅感覺，燒出嚟好Juice。薄切牛舌：好容易燒，口感幾好，牛味充足。雞肉：連埋雞皮燒好香脆，雞肉柔嫩滑口海蝦：新鮮，肉質Q彈日本牛奶雪條：奶味香濃個爐頭仲可以自己揀大中細火，配合唔同嘅食物調教大細，中途仲可以請侍應幫忙更換網，抽風系統做得幾好，唔大油煙。用輸送帶傳送食物，幾有趣。出邊飲品吧同埋沙律吧都有好多唔同選擇。甜品有三四款，雪糕都有三四款。