聖安娜餅屋 (已結業)

長輩壽辰，宴席親友一大圍，一眾表兄弟姊妹為表心意，送上連名都濃情過人o既「熱情果芒果比利時55°朱古力蛋糕」，以示祝賀 。原來喺「聖安娜餅屋」訂蛋糕，流程已全面電腦化，餅店妹妹手持平板電腦，記錄訂單詳情後，客人可即時核對內容，快捷方便。俾錢時，妹妹更細心地提點如用中銀或恆生信用咭付款，現可享八五折優惠 ，嘻嘻，小肥當然係唔會執輸啦！晚餐接近尾聲，餐廳伙計推出蛋糕，壽星公驚喜感動之情，全表露於面上 。「熱情果芒果比利時55°朱古力蛋糕」o既朱古力表面光滑亮麗，入口亦覺柔滑濃甜，中間兩層朱古力味蛋糕濕潤鬆軟，橙黃色o既熱情果及芒果夾心酸酸甜甜，清新消滯，加上最底層香脆o既朱古力薄脆，生日蛋糕層次分明，口感豐富，香濃甜美 。小小蛋糕，內含濃情厚意，熱情果與朱古力的魔力，足以令生日會場氣氛生息不少，Uncle Jonathan，願祝您生日快樂，身體健康！