春風撞奶舖 (已結業)

之前試過本店「春風三月」既珍珠奶茶，非常難飲，好似清水加左啲奶粉一樣咁稀⋯ 係我飲過最難飲既珍奶之一。所以對姊妹店「春風撞奶舖」冇咩期望，加上大家對佢既評價都好差。但因為呢排實在太愛黑糖鮮奶，周圍去試唔同舖頭整既版本，所以決定比一次機會佢！冇想像同傳聞中咁難飲。奶味好重，感覺應該唔係牛奶係奶精，飲落好「蘇」，我自己鍾意奶味所以唔抗拒。黑糖味唔多，珍珠口感唔似傳統咁彈牙，係好似芋圓、糯米滋咁軟淋淋，我自己幾鍾意。總括黎講，出面大把好飲過佢既黑糖鮮奶，但想嘗鮮既朋友都可以一試！反而令我好唔滿意既係店員既態度，我黎到櫃台前見唔到人，原來店員特登匿係收銀後面唔想比人睇到。我想叫野飲時，佢成副愛理不理、冇咩反應既樣，好似我阻住佢hea咁😓😓另外一位係入面整野飲既店員，整完杯野就咁放係枱面，但因為放得太入，我拎唔到，佢之後一野「推」杯野飲去我面前，杯飲品比佢咁推一推「滑」過黎⋯⋯ 搞到入面既奶茶飛左少少出枱面⋯😰