荔苑茶餐廳 (已結業)

荔園遊樂場又係另一個香港人嘅集體回憶，以前未有海洋公園時，尤其九龍人，去荔園真係好開心，好多嘢玩，尤其拋銀仔中香口膠。荔園無咗好多年喇，我諗好多後生都未聽過有個咁嘅遊樂場，凈係識海洋公園同廸士尼，依家塊地就變咗美孚盈暉臺、華荔邨、荔欣苑！係朋友屋企開完小組，又係晚飯時間，就落咗盈暉臺下面商場間搵食，主因都係貪方便，費事過番美孚新村，結果揀咗荔苑茶餐廳幫襯，老友話哩間未係最好食，不過又唔太差，只係另外一間好食D嘅又無位，費事等就揀咗佢。晚市茶餐廳嘅殺著都係D小菜套餐，依度唔例外，小菜套餐$43，煲仔菜套餐$46，例牌配例湯加白飯。雖然價錢方面唔算話好抵，但碟頭份量搭夠，而且選擇夠多，小菜有成50款，煲仔菜都有14款，款式都係一般傳統嘢，但又啱我哋哩班老鬼口味：西檸鴨、鮑片扒生菜、中式牛柳、菜甫肉碎煎蛋，係咪好傳統，好老餅吓呢！幾個餸都幾啱食，亦都好耐無食哩幾款菜，又有多少懷念。講質素，依幾個小菜不過不失，街坊水準，不過勝在份量都真係幾多，近乎去食大排檔份量，真係可以三個套餐四個人食，所以，計落又可以話幾抵！可惜，位置隔涉，一眼睇晒大部份都係街坊客，笠衫波褲人字拖，無乜招牌嘢，好難引到D區