鰹烏冬 (寶華閣)

營業中

休息中

成日都有人排隊，今次星期六去食，大約要排15分鐘。如果咁啱坐正吧位，就可以睇住師傅開機擀麵團切烏冬，好過癮。*鰹魚半湯烏冬 $46烏冬熱食，粗身，非常彈牙，質感滿分，帶強烈麥香麵粉香。半湯係濃縮鰹魚汁，帶鮮甜魚味又帶醬油香，份量比清湯烏冬少，所以係日式撈烏冬，濃度啱啱好，烏冬少少掛湯，食落唔會太鹹。夏一烏冬 $55睇名就知道係夏天食嘅烏冬，凍食烏冬比熱食烏冬更加彈牙，我覺得質感偏硬，熱食比較啱我口味。將蛋黃同酸汁撈埋一齊，非常清爽，但今日醬汁多咗啲，所以蓋過咗蛋香味。天婦羅雞件 $42新鮮炸起四件天婦羅雞件，每一件都好大件，麵衣完全唔油，外面香脆，入面嘅雞件依然juicy，唧少少檸檬汁，有種清爽感覺。骨付雞 $44骨付雞係燒雞脾，陣陣雞肉香味飄來，但我略嫌雞皮燒得唔夠焦香。雞脾肉厚肉，熟度啱啱好，肉質非常嫩滑，雞皮煙韌有咬口，有啲油膩感，而雞髀整體偏鹹偏油，碟底都係油，食完成嘴油。