熨烤達人 (已結業)

周圍走左成日好攰，黎到鑽石山又唔想食連鎖店，夜晚八點幾呢間竟然要排隊，又見上網咁多好評，就等下啦，點知一等等左半個鐘有多。因為行到好熱，無mood食燒肉，見餐牌熟食都有好多選擇。先飲下野，雖然唔平，但勝在夠大杯，味道都好豐富。沙冰更加好飲，都睇住店員即叫即打，好新鮮。鰻魚蛋卷每件都好厚，包住舊鰻魚都好大塊，非常足料。 淋上鰻魚汁同埋鰹魚碎，味道唔會有問題啦。呢個韓式粉絲炒得幾好，口感爽滑，夠色水得黎甜多過鹹，配埋菇絲同紅蘿蔔絲加添口感，唔落肉都好味。呢個雪龍湯就同我地係韓國食到既有d出入，當地會比較清澈，個奶白色都主要靠牛骨燉出黎。呢度就係用忌廉奶做，會稠身同埋膩好多，所以飲唔哂d湯。勝在牛肉份量都幾多。呢個賣相吸引，配搭都好特別同清新。不過個人覺得唔好落咁多沙律醬，自己要減走d先撈就會無咁膩，加落去做紫菜包飯或者用雪糕脆筒食都可以。可能無食到烤肉既關係，未食得出佢最出色既一面，下次要試下。