甜蜜蜜甜品專門店 (已結業)

同兩位師姐食完一頓抵食又美味o既京滬點心做晚餐，大家仍有感意猶未盡，結果就行咗去厚福街度搵甜品食 。路經「甜蜜蜜甜品專門店」時，先翻閱過餐牌，覺得啲甜點都幾吸引，見店內又有張四人枱正向我地招手，所以就即管睇吓佢有幾甜蜜蜜。小店間隔跟一般糖水舖無異，地方企理，服務生都好好客。三人先各自挑選心頭好，兩位師姐明顯都係芒果迷。小肥就點咗個「焗黑白朱古力梳乎里」；落單時，姐姐仔已講明焗製梳乎里需要大概十五分鐘。焗黑白朱古力梳乎里（$48）：甜品內含兩個梳乎里，分別為相片中右手邊o既「熱食黑朱古力味梳乎里」及左手邊o既「凍食白朱古力榛子味梳乎里」。另跟朱古力醬一小碟。傳統熱食o既「黑朱古力梳乎里」鬆軟輕巧，微甜芳香，中間加插咗啲朱古力碎又能增添脆脆o既口感，實在美妙 。餐牌上所指o既「凍食白朱古力榛子味梳乎里」其實並非「梳乎里」也，點睇點食都只可以話佢係一球勁甜o既白朱古力味雪糕，質感粗嚡，一啲都唔「梳乎」囉 ，直令甜品有重畫蛇添足o既反效。