牛極 (大全街) (已結業)

繼續一支公嘅晚餐。今日有事務要處理，去開大角咀嗰頭，趕時間又肚餓，見到呢度有牛極就入去快手食個飯。呢間分店嘅門口好特別，係一個紅色大鳥居。牛極間間分店都一樣，燒肉揀好，喺自助售賣機落單俾錢之後就自己揾位坐低。之後等燒肉上枱期間，可以去自助沙律吧攞沙律食，仲有熱湯同白飯，全部任食。餐具同水自己攞。所以係冇收服務費嘅。呢排成日出街食，等我平平哋叫塊最細塊嘅牛肩排算數。牛肩排 180g $80燒肉好快就送上，快靚正。雖然唔貴，但係塊排都唔欺場，幾厚身上面又放左啲黃薑絲。切開就見到入面未熟，自己切做自己入口嘅大細，再喺塊熱石板上面烤幾烤就好快食得，要快手，如果唔係外圍會太熟。質素保持一貫水準，都算嫩嘅。今次落左枱上供應嘅燒烤牛排調味料，味道更好。圍裙都係自助自己攞，一定要攞，因為d汁彈到周圍都係。沙律係例牌嘅生菜，仲有車厘茄同粟米粒。湯都係例牌嘅日式牛肉湯，我食唔到牛肉，不過有紅蘿蔔同白蘿蔔。肉汁有三款，分別係自家製燒肉汁，蒜蓉同辛味芥末燒汁。