犢食 (已結業)

工廈中o既小清新日式小店，提供丼飯、湯咖哩飯同埋一d 日式小食，內裡全部都係木造高檯高凳。作為有著濃厚政治理念o既餐廳，牆上同收銀長檯o個邊自然放滿各類文宣、書籍同報章。睇落都幾多人買外賣，見有人拎住大枝結他，唔知係咪附近band 房d band 友呢……﹖試o左個溫泉蛋牛肉丼套餐($58 無加一)，連埋一份漬物小食同玄米茶(可以揀味噌湯，或者再加錢升級)，咁o既價錢算係幾平民！用木盤送上o既定食，賣相吸引。漬物係一d 醃製豆呀，雲耳之類，甜甜鹹鹹咁一小兜。主體個飯好大碗，牛肉亦份量居多。隻溫泉蛋o係上面o郎下o郎下係咁勾引我，肥牛煮得入味得o黎唔過乾/韌，個飯因為本身都淋得足d 洋蔥牛肉汁，加埋流心蛋黃，而家超級juicy 惹味！同埋瀋上去d 生蔥都好香。收銀姐姐推介之下，點o左個小食，佢話呢個照燒魷魚串($18) 都多人叫！厚身魷魚，帶點鹹香，蘸埋沙律醬更好味~跟餐配玄米茶，一昧靜靜o既日式風情。想高級d，一於學我，整番枝靜岡蜜瓜梳打($24)。蜜瓜係日本靜岡縣名物，如寶石般翠綠o既綠色，簡直就係滿口香甜，幸福滿溢~