日喜樓 (已結業)

之前一直想食日喜樓鼎鼎大名嘅百碟宴，但今次得兩個人，所以擇日再戰，今次試下其他菜式先。日喜樓位於basement，樓低高，面積大，裝修無乜特別但座位十分寬闊，我地坐係梳化位特別舒服。餐單係ipad入面，與時並進。一開始叫左碗陽春麵，大大碗非常簡單，旁邊有大量翡翠苗。四喜臨門係四種味道嘅小籠包，包括原味、蒜香、九層塔同茴香。整體小籠包皮薄幼滑，蒜香同九層塔最啱我口味。見到電子餐單推介宋嫂魚羹，當然唔執輸叫一碗試試。魚羹非常足料，內含筍絲，冬菇絲等等，口感豐富，整體味道酸酸辣辣，夠晒開胃，作為第二道上菜非常合適。爆汁牛肉餡餅果然名不虛傳。外皮香脆，作為餡料既牛肉非常多汁，一咬開果下啲肉汁噴出黎。女友最鍾意食酸菜魚，所以叫咗酸菜斑片俾女朋友，每一片啖啖肉冇咩魚骨，湯底既辣度同酸度非常平衡，配材亦有冬菇、鴻喜菇同埋薯粉，略嫌班片唔夠酸辣。日喜樓近日出左推廣，以優惠價$159叫半隻北京填鴨加12件薄餅。薄餅口感煙韌，鴨肉嫩滑，油脂味香但唔覺太膩。鴨肉連埋大蔥絲、青瓜絲、甜麵醬，用薄餅夾埋一齊食。下次再嚟將會係我食百碟宴嘅時候。