瓏門冰室 (已結業)

今個晚上要喺尖沙咀返學上堂 ，上堂之前就自己一個人食個飯填下肚。喺金馬倫道經過一間新開嘅冰室 ，叫龍門冰室， 見入面裝修十分新淨 ，就本著姑且一試嘅心態入去。店員有禮貌地給我安排座位， 第一步梗係睇下個餐牌， 雖然係小小嘅一間冰室 ，但係食物款式十分多， 簡直可以用花多眼亂嚟形容。最終我選擇咗我最喜愛嘅卡邦尼意粉 ，先唔講個意粉。 第一個奉上嘅就係粟米湯 ，其實對於呢啲餐湯本身冇咩要求 ，但係呢個粟米湯竟然出奇地濃耶，而且有好多粟米粒， 我飲到一滴不淨。接下來嘅就係厚多士 ，足足有成寸幾咁厚 ，而且仲有兩塊咁多 ，點住粟米湯嚟食，正。然之後到戲肉喇， 蜜糖雞翼卡邦尼豬扒燴意粉 ，又有雞翼又有豬扒啱曬我呢個食肉獸 。意想不到嘅係竟然有三隻雞翼咁多， 而且塊豬扒亦都好大塊。 卡邦尼意粉又點少得煙肉呢， 新鮮焗出嚟熱辣辣 ，意粉沾滿了白汁 ，yummy 。總括嚟講68蚊有咁多嘢食 ，係尖沙咀市中心嚟講實在係大件夾抵食，物超所值， 有機會下次再試下其他食品先。