Cali-Mex Bar & Grill (灣景街) (已結業)

特別嘅一個體驗！平時飲1664 Blanc係一杯杯斟好攞來，呢度就可以揀斟好俾你，或者自己斟，斟幾多，計幾錢，枱面自己斟，電子磅都係枱面，好特別！墨西哥菜，選擇唔多，來來去去都係墨西哥卷，或者墨西哥飯，拼豬牛雞。再揀大中小辣。我哋揀咗豬肉墨西哥卷（脆玉米餅皮 - 即係平時墨西哥粟米片大塊版），小辣。豬肉一粒粒，再有菜、醬料。我鍾意食牛油果，所以特登加$18加牛油果醬，來咗個綠色醬，食落去無牛油果味，只係辣味，問侍應，佢話source包咗喺卷入面。但食來食去食唔到牛油果味，再望望隔離左右，人哋係一大pat綠色傑撻撻牛油果醬另上，於是特登搵返落單個侍應問有無落到單，佢話無。好啦，埋單，加咗$18牛油果醬。食咗加錢係無問題，問題係無食，確認無落單，最後收咗錢，好亂！我當然叫佢減返條數啦，根本無加到牛油果醬。雞肉墨西哥飯 - 一般。墨西哥飯，味道係星洲炒飯嘅味道，無特別。而且全部配料係一盒盒整好晒，然後因應客人點選後加上去，即係好似Super Sandwich整包咁。貪新鮮一試無訪！又或者坐低飲嘢傾計都幾好，因為兩隻啤酒 - Asahi & 1664 Blanc可以隨飲隨計，唔怕飲唔晒。