拳王泰國餐廳 (已結業)

是日男朋友生日，去完海馬公園就去銅鑼灣食飯，本來打算食放題，不過因為唔肚餓所以放棄。起地鐵C出口行左一陣見到呢間泰國菜好似幾有特色，係關於打拳(後來發覺銅鑼灣都幾多拳鋪)，而且可以點埋另一間叫原道燒場的食物，一於試一試。入面好多擺設都係關於打拳，連入面電視都係播緊拳賽。我懷疑老闆本身係咪開拳館？🤔入座即上脆卜卜蝦片一碟。好快就上第一味餸，牛香脷👅 。燒完唔會好乾，可以選辣度，我地點小辣都幾辣下，其實原味都應該夠好食。燒豬頸肉，份量都幾多，醃得入味，再點上微辣的泰式汁真係絶配。原個菠蘿炒飯有好多海鮮鋪面，青口，魷魚，蝦，帶子，再加上肉鬆同腰果。飯底炒得唔濕，份量都唔少，每人都添左兩三次先食完。最後係上燒大蝦，加上蒜蓉醬燒到幾香，雖然唔算大隻，但好多蝦膏，唔使點汁已經夠味。