藍象泰國餐廳 (已結業)

Item: 藍象泰國餐廳
Rating: 5
Author: Monkey Hin

Blue Elephant Thai Brasserie

645 食評

味道

環境

服務

衛生

抵食

11161

尖沙咀

$101-200

泰國菜咖喱

479

Monkey Hin

等級4

648

同事成日去泰國, 而佢又成日同我提話佢去泰國食過一啲高檔既泰菜好好味, 環境又靚, 間餐廳叫 Blue Elephant, 佢叫我叫果去Bangkok一定要去食, 但咁啱比我揾到原來香港都有呢間餐廳, 仲要係位於尖咀海港城, 於是我昨晚就同左我屋企人去食。餐廳位於海港城既港威商場, 都算好易揾, 而且好靚, 好高檔, 黑色既佈局再配埋望出去係180度既維港夜景, 真係無敵, 而且座位寬闊, 枱與枱之間都有好充足既空間, 所以食飯既時候你唔會覺得迫, 亦唔會比附近既食客嘈到你。帶位既女店員態度非常有禮, 笑容親切, 我覺得絕對會因為咁而加分!

其實呢間藍象既食物真係有太多選擇啦, 所以我地坐左係度睇menu都睇左起碼10分鐘, 選完呢個又想試第二個, 不過得兩個人都唔可以食到太多野, 最尾我地選擇左大路既咖喱同埋小食拼盤等等..

咖喱我地選擇左一個比較特別的, 叫做 Massaman Lamb, 「香濃馬沙文咖喱配羊肉」 ($238), 小食拼盤 ($168) 有泰式沙嗲雞串、泰式沙嗲豬肉串、藍象炸蝦餅、好似炸雲吞既「脆皮青咖喱黃金包」、同埋一個泰式特色小食, 叫做 Ma Hor , 「馬可慢煮花生軟糖配新鮮菠蘿」，另外我地仲點左「泰式椰子雞湯」(兩位用$188), 黑米飯 ($20), 油鬆餅 ($55), 飲品 Blue Butterfly ($55), 賣單係 $778。

呢度上菜算好快, 10分鐘內幾乎所有菜都已經上齊, 我地7點鐘入座都唔洗等位。先講個沙文咖喱羊, 係加左八角, 估唔到咖喱加八角係咁好味, 會咬到一粒粒既八角 (數量不多), 好香好香, 而羊肉非常tender, 好大件, 好足料, 充满住羊肉既獨有羊香味, 而最正既係佢加左紫蕃薯, 而唔係用普通既薯仔, 感覺個層次又再提升左一級! 個咖喱一定要配油鬆餅, 個油鬆餅好香口, 微微脆而帶軟滑既口感, 食落非常鬆化, 加左加文咖喱, 我超級鍾意! 個咖喱係甜甜地唔太辣, 而且有啲好脆好香口既腰果, 兩個字, 好味到爆 (四個字先啱)!

食左啲濃味既野梗係要有啲清甜既湯滋補一下, 平衡下個味蕾, 不過呢個椰子雞湯又出乎我地意料之外地香濃, 係好濃好濃, 少少稠, 勁多嫩滑既鮮雞肉, 個湯係純白至米白色既濃湯, 每一口都充满住新鮮白雞再加上濃郁椰子既香氣, 衝擊住你既味蕾! 呢個湯好似6號成日講既果3個字, “不得了”! 呢個湯真係不得了, 好正! 我話你知, 我以後黎Blue Elephant我每一次都一定會叫呢個椰子雞湯! 係一定!

呢餐我地無叫過菜, 唔記得左, 不過好彩叫左高纖既黑米飯, 高纖得黎黑高又高鐵質, 好滋補, 用黎配沙文咖喱都係唔錯既選擇。軟熟得黎又有咬口, 但係唔會食到你成個口好攰果隻咬口，好有水準。

再黎係小食拼盤, 好多野, 每一樣都細細件, 有兩件, 可以試多幾種唔同既野食吖嘛! 最啱我地呢啲唔係食得超多野但又心大心細想試多幾款唔同野食既人! 個串燒其實係有兩種醬汁, 比你任君選擇, 有沙嗲汁, 又有甜酸雞醬, 我鍾意沙嗲汁多啲, 貪佢夠香甜, 用黎點雞串豬肉串都啱, 不過雞串同豬肉串都偏硬身, 面頭有少少焦香, 可以燒得短時間啲會嫩滑啲! 炸蝦餅好特別, 食到入面係有一粒粒蝦肉, 夠真材實料, 仲以為蝦餅會比較細件, 但其實4件都幾多幾大塊, 面層好脆, 正! 跟住食左一個好特別既慢煮花生糖, 咬落有一糖糖既花生碎, 甜甜地, 配埋菠蘿, 口感特別, 花生糖係咸甜混和, 再加埋菠蘿既多汁鮮甜, 中和返, 好清新既感覺! 而青咖喱黃金包, 真係好似細細粒既炸雲吞, 入面係雞肉, 似雞肉丸, 幾特別。