燒肉の殿堂

營業中

休息中

🏯大阪城和牛五點盛合以大阪城造型三層盒，由上至下分別放上牛金塊磚，和牛肋條，牛三角腩，另外仲有特級厚牛舌及和牛五花！A4和牛油花分布均勻且細緻，稍稍放落燒烤鐵板，立即有著濃郁香氣，油脂好快溶化，肉味香濃。配上自家燒肉汁，檸檬海鹽，辣味噌，三款同樣惹味，建議油份較高的用檸檬海鹽，可減低肥膩感，但又能突顯油香味。🐮湯漬A4和牛薄片超創意食法，先用火槍將和牛三角薄片灸燒。灸燒其間已聞到香噴噴，睇見都食指大動！灸燒後更見肉質光澤鮮嫩，而且入口香軟，我會先咬一口再放入麵豉湯，兩種食法超滿足。🦪蒜燒珍寶生蠔珍寶生蠔有我手掌咁大，蒜香唔會好濃烈，剛剛好唔會蓋過鮮甜味！稍稍燒到生蠔乾身便可，一咬juicy。🥚明太子撈烏冬伴月見簡單又好食，全因材料正。超滑烏冬，彈牙兼有嚼勁；明太子足料鮮味；日本蛋蛋黃色澤光亮，蛋黃濃郁。清新醒胃醬汁，全部嘢加埋點會唔好食。飲品: 雜果賓治，龍鳳檸樂食燒肉點少得飲soda，雜果賓治唔會太甜又夠多果肉；龍鳳檸樂其實係鹹檸七，但改用可樂，原來又幾match，清熱氣又解渴。