生記粥麵 (已結業)

去廣華覆診，聽到護士們討論中午要去生記粥麵午膳，反正我下午又要回醫院檢查，近近地揀左生記食粥。平日嘅十二點幾，當時客人唔算多，入座率大約6-7成。多年冇幫襯過生記了，唸住望清楚個餐牌先，一坐底店員已經企喺旁邊，不停問我哋食乜，我哋話睇多陣轉頭先，佢真係轉個頭唔夠20秒就再企喺旁邊有點不耐煩的問我哋點得未。問店員袖珍類同正常的單併類有乜分別？佢話䄂珍類細碗d喎🤔睇唔切個餐牌，唯有靠記憶點呢度最出名的魚腩粥、單併豬肉丸粥，再點碟油炸鬼啦。招牌鯇魚腩粥有大約6件魚腩，鮮甜👍🏻，配薑蔥豉油食一流，保持到當年水準。我反而對豬肉丸粥不抱太大期望，但將匙羹攪動碗粥時，發覺攪唔旭，因為肉丸數量太多，數一數有成13粒肉丸(相片只影到浮面果層肉丸)，肉丸結實彈牙，有驚喜👍🏻而個油炸鬼呢，絕對絕對不建議大家點，唔脆，用筷子夾已經覺得林，油炸鬼的味道但牛脷酥嘅口感，一個字，實！下次都係食返佢最拿手的食物～粥！食食下留意到身旁有個客人叫左袖珍類肉丸粥，發覺碗粥嘅大細同單併類一樣，只係肉丸少d，6粒左右。原來袖珍唔係碗粥細碗d，而係少餸d啫。