道頓堀御好燒專門店 (朗豪坊) (已結業)

喺香港想搵有得食有得玩嘅餐廳好難，一般嘅選擇都係日式燒肉同韓燒。呢間日式嘅道頓堀御好燒專門店就係另一好選擇，玩味好重嘅餐廳，令人十分期待！首先叫左一個海鮮五品御好燒，有帶子，明太子，魷魚，蝦等等。配料有椰菜，紅薑，蔥，蛋同炸粒，非常豐富！枱上仲有必需嘅醬料，燒汁，沙律醬，紫菜碎同木魚碎，可見餐廳很希望將真正嘅御好燒呈現，很認真呢！由於我地第一次食，店員見到我地周圍研究啲用具，好貼心咁走嚟介紹每樣野點用。材料送上後，我地自己先拌匀所有材料，之後再跟教學做，第一次做有咁嘅樣，我地都覺得唔太難呢！呢個就係成果啦，急不可待想快啲食呢！之前喺日本食過正宗老店嘅大阪燒，覺得呢個其實同日本嘅味道大致上一樣，十分多層次！呢度海鮮嘅用料十分新鮮，特別係帶子，鮮甜美味！一個當然唔夠食啦，叫多一個！今次增加難度，叫左一個雜錦廣島燒。主要不同之處係多左一個麵，其他材料有少少唔同。食落就多啲層次同口感，飽肚感亦重啲。味道一樣好味！總括而言，餐廳有誠意，認真，價錢亦合理，可見點解長期咁多人排隊食呢！