花見月 (已結業)

一直聽聞科學園環境唔錯，有得玩有得食，於是即管去睇下。6點幾見肚餓，選咗呢間日式餐廳，環境整潔，全落地玻璃好吸引我。睇餐牌好多嘢都想試，於是點咗照燒澳洲牛扒定食、燒牛舌串、紫菜芝士年糕、67度溫泉蛋雞肉凱薩沙律、花見月特上魚生定食和苦瓜海葡萄沙律：照燒澳洲牛扒定食選料好正，牛扒煎得剛剛好，入面少少粉紅色好嫰唔會乾。牛舌軟硬剛剛好，配上黑椒碎超惹味。紫菜芝士年糕好得意，啲芝士味好濃，咬時要小心，流心架，會唧出嚟。67度溫泉蛋雞肉凱薩沙律，隻溫泉蛋入口好濃蛋味，半流心感覺質感好豐厚，雞扒加上好多菜絲，份量勁大，一上菜就心諗死啦，今次實食唔晒。花見月特上魚生定食啲魚生好靚，有金槍魚腩，三文魚子，海膽，吞拿魚腩蓉，蟹肉，有隻大蝦，蟹柳，玉子，金槍魚腩入口好滑，淡淡油香，其他用料都好正好鮮味，海膽都好多，絕對物超所值。最後一味苦瓜海葡萄沙律屬於清新類，苦瓜微甘，海葡萄偏咸，配上口味清淡嘅菜絲同沙律醋，幾種味道調和得剛剛好。望住窗外風景一路慢慢食，絕對係非常寫意嘅選擇。