樓下冰室 (已結業)

表妹放緊暑假，趁仲未開學，今日揾我行街食飯，經過路德圍，表妹話未食過呢間冰室，我同佢講我食過瑞士雞翼好正，表妹即刻好開心話要試下。我點咗一碟滑蛋叉燒飯，大大碟，好多蛋同叉燒，舖滿成碟飯，叉燒係半肥瘦的，好食。表妹要了焗芝士肉醬意粉，因為係即叫即整，要等廿分鐘都無所謂。呢份意粉亦係好大碟，熱辣辣，好多蕃茄芝士，想唔好食都幾難。見到隔離差不多每枱都有叫瑞士雞翼，我哋都唔執輸，啲雞翼都幾大隻，醃得好入味，保持水準。飲品要咗阿華田脆脆同菠蘿冰，阿華田上面嘅脆脆真係好脆，菠蘿冰嘅菠蘿係新鮮菠蘿嚟㗎，一邊食一邊飲，爽！我哋兩個食到好飽，埋單找數都係佰零蚊，表妹話好抵喎，咁我又覺得真係好過去快餐店多多聲囉！