木槿花韓牛專門店 (已結業)

餐廳分上、下兩層，上層正門就喺士丹頓街，下層有另一個門口就比較難搵。裝修簡潔，冇繁複裝飾，始終燒肉大油煙，越簡潔越乾淨。先嚟前菜開開胃，有三小碟，分別係菠菜、芽菜同泡菜。湯只有一片蘿白同一塊牛粒，好多油，但味道唔錯。提供生菜、蒜粒、鹽、韓國醬汁（唔辣，味道有啲似豆瓣醬）任意配搭。用生菜包住嚟食可以減低油膩感，又可以均衡飲食啦~喺韓牛專門店，主角梗係韓牛啦，點可以唔叫呢？韓牛出名係牛味香濃厚重，燒到六、七成熟就最好喇！左至右係：封門柳、腹脅兩側肉、腩包肉，排列整齊。封門柳每隻牛只有兩條，所以一般喺街外係好難買到，識食就一定要試，正野嚟架喂~ 總共有八片，仲要係厚切。油花唔算多，但肉味最濃最重。腹脅兩側肉雪花紋理肉平均分佈。肉質纖維較粗，所以會薄切，入口富咬勁，都唔錯。腩包肉切到一條條長條，睇啲油花已經知油脂非常豐富，真係咇晒啲牛油出嚟，入口甘香鬆化，好軟腍又香滑。配埋白飯，夠熱夠大碗，好滿足！飲品可以單罐叫，又可以$40/位 任飲，細細罐，可以叫多幾款唔同飲品試吓。最後要讚吓服務好貼心，店員會問客人要唔要圍裙，又會細心講解點燒最好，仲會幫手燒埋。