Next Station Dessert (已結業)

同朋友傾計講開佢食過一間甜品鋪既甜品款式好特別，一直都想試，可惜好多時食完晚飯都好飽，一直沒機會。今日食果餐晚飯真係未飽，係時候試下！ 餐廳都幾有格調，而且坐滿晒人，好在仲有位比我地坐。 餐牌既甜品好多都好新穎，有創意，直頭好似一件藝術品！而且又未係其他地方食過，都幾吸引。 Chocolate Molten Cake心太軟配曲奇雪糕表面冇咩新意，原來佢有支管仔插左落心太軟度，感覺其實好似打針咁，好得意。至於果枝針，其實係酒，有四隻味道可以選(酒心果，朗姆酒，干邑橙酒，百利甜酒)。打左針既心太軟食落多左酒味，減低食落去口乾既感覺。心太軟本身都整得幾好，中間流心部分夠溶溶，外層鬆軟，水準之作！ French Chocolate Pancake 有三件大大件既pancake，配埋青檸雪芭。朱古力班戟味道香濃，班戟既外層唔會太厚，反而中間既朱古力夠多夠厚。青檸雪芭夠fresh又夠輕怡，能夠中和香濃厚既朱古力味，這樣既配搭一流！其實仲有一個甜品好似試管咁都好得意好想試，可惜已經飽左，留番下次！