たまご園 (形點 I)

營業中

休息中

因工作關係今日過到嚟元朗。午飯時間就喺附近搵嘢食。見到商場裏面有間餐廳Tamago-EN特別光猛整齊，所以決定一試。餐廳以雞蛋為主題。以日本沖繩直送新鮮雞蛋為賣點，製作正宗玉子料理。更加有生雞蛋的料理可以選擇。店舖裝修簡單而整潔，簡單嘅蛋白加蛋黃嘅顏色，得意之中亦都非常簡單舒適。無論長身枱面以及天花板你都見到可愛嘅雞蛋造型，小朋友一定十分喜愛。原來午飯時間更更有沙律同埋湯附送。看過餐牌後，好想試吓佢哋嘅生雞蛋。所以點了"特製TKP～海蝦明太子醬冷意粉"。沙律嘅蔬菜非常新鮮爽脆，配以日式芝麻醬，實在係一個非常好嘅頭盤。吃過沙律後，主角嘅意粉終於來到。原來生雞蛋下邊就係用蛋白打成嘅泡沫，配以相當之多嘅沙律菜、新鮮冬菇及本菇，以及相當多嘅海蝦，賣相相當吸引。當蛋黃汁混和了蔬菜、海鮮以及冷製天使麵之後，蛋汁發揮了非常重要嘅角色，它將意粉海鮮菇類融會在一起，相當柔和的感覺。當中廚師特別加入左少少嘅紫蘇葉絲，令到整碟意粉柔和中帶點清新，亦都係整碟意粉其中一個亮點。唯一美中不足的是當中嘅海蝦雖然係爽脆但係缺乏鮮味。舒適的餐廳加上這個用心製作嘅意粉，盛惠$100左右，相當滿意吧。