Boring?! (黃埔天地美食坊) (已結業)

約咗好姊妹去黃埔行街，要搵飯食美食坊係最好選擇，一段時間冇黎又轉左唔少新牌子，呢間西餐廳門外睇落感覺唔錯，價錢又夠優惠就走入去。餐牌選擇唔需要多，啱食就夠，呢度嘅二人餐有幾款選擇，揀咗呢款有羊架又有牛扒嘅， fit晒我哋口味。黑松露野菌泡沫忌廉湯，賣相非常別緻，泡沫輕盈綿密，黑松露香味十足，加上野菌嘅香味，同有特色嘅芝士多士，感覺餐廳質素唔錯！香芒大蝦沙律用上新鮮沙律菜，大蝦爽彈，肉質結實有甜味，朋友覺得芒果味道清香，我個人就鍾意味道再重少少，但整體來講都幾好。美國肉眼扒同羊鞍個都點左七食，兩樣味道都唔錯，肉眼扒肉汁煎封得好，夠入味而且食落軟諗，同最近去令一間西餐廳簡直有天淵之別！羊架有3枝咁多，有別於平常伴碟嘅薄荷醬，呢度用薄荷醬同乳酪煮成汁，又好味又有特色，而且羊架一啲都唔羶，如果骨位再燶少少就完美！不過我更加欣賞盛著羊架嘅煙肉洋蔥薯餅，同普通薯蓉相比，多咗一份鹹香同焦香味道，平時食羊架比較少配上呢款薯餅，感覺到店家嘅用心同埋誠意。五百幾蚊2位各三道菜加埋飲品，而且環境又舒服，呢個價錢真係夠晒優惠！