食包 (已結業)

朋友推薦咗哩間漢堡好耐，今日行開太子，咁一定要試下。鋪頭唔大，裝修得幾溫馨，有兩張高腳台可以堂食，仲設置有姜濤打卡位，幾啱姜濤啲fans打卡。有十幾款漢堡同熱狗可以選擇，今次揀咗肉醬漢堡同黑松露煙肉牛堡，加18HKD可以升級套餐，包埋一份小食同罐裝飲品。所有嘢食即叫即整，都唔洗等好耐，就有得食。水牛城雞翼，係套餐加配，一份有2隻，雞翼炸得脆啵啵，醬汁夠多夠惹味，酸酸辣辣好食。炸魚寶，一份有3件，面衣好薄身脆口，魚肉冇骨好幼滑，點落茄汁一齊食，好味。肉醬漢堡揀咗牛肉，配料勁豐富，有番茄，生菜，芝士，牛肉同煎蛋，肉醬比咗好多，每一啖都食到肉醬，都幾得意，好似食緊肉醬意粉，OK喎。黑松露煙肉牛堡好大一個，有煙肉，雞蛋，牛肉漢堡扒，芝士，生菜同番茄，同埋勁多黑松露醬。牛肉漢堡扒煎得啱啱好，爆哂juice仲有少少焦香味，雞蛋都煎得幾好，係流心蛋。成個漢堡好重黑松露味，鐘意食黑松露啲FD一定唔可以錯過。漢堡搭配埋汽水一齊食，真係享受。全部嘢食都可以睇到係用心製作，難怪FD勁推薦啦！