La Vigne (已結業)

今日同朋友行經大角咀，見到一間餐廳裝修幾靚，就入咗去試。店入面環境好令人放鬆。我同朋友坐咗喺一張大枱，位置好寬敞，坐得好舒服。侍應好好禮貌，好有心機咁同我哋介紹有乜嘢食。餐廳提供好多唔同嘅選擇，例如有dinner set （包咗餐湯、沙律、甜品同埋$20嘅餐飲）， 如果揀唔啱嘅話仲有得散嗌，同埋有啲小食。而餐廳仲會有廚師推介，仲要係定期更新㗎，今晚就有燴牛尾配意粉或者配飯嘅套餐，我同朋友就叫咗個嚟試。今晚嘅餐湯係甘筍湯，飲落去好香甘筍味，好正宗。跟餐嘅沙律都做得好有心機㗎，有唔同種類嘅蔬菜，又好睇又好食。個牛尾我哋揀咗配意粉，意粉好彈牙，牛尾炆得好林，同埋好入味，尤其是係啲蘿蔔。餐飲我哋揀65%朱古力，好濃好足料好好飲，但係記得搞勻先飲呀。我哋仲另外叫咗個西班牙黑豚火腿片伴哈密瓜，性價比都好高。 另外叫咗個蘋果金寶配焦糖雪糕。睇個賣相已經覺得小店好用心整，食落去好香牛油味，絕對值得推介。整體嚟講今次用餐經驗好愉快：環境舒適、啲嘢食好好食、侍應服務態度好好。食完飯之後，侍應仲特登同我哋攞feedback添。誠意推介大家黎試下，支持下小店。