餃里 (悅湖商場) (裝修中)

屋企伙頭大將軍逢星期三、六都要停工，所以呢兩晚都要自己攪掂。但我樂於每星期有兩晚，可以唔限區域去找好東西吃。呢晚我就去咗買餃子食。其實呢間餃子外賣店唔近屋企，但我仍然搭車去買。事關呢間餃子店標榜新鮮包，就算買生餃返去煮，第二日煮味道都會大打折扣，唔及佢哋響舖頭煮好返屋企即食。 今年農曆年後佢哋轉咗餐牌，除咗有新餃子，對我最重要係佢哋湯底選擇多咗。之前佢哋只有豬骨湯底，而家我愛上咗配素湯底。因為素湯底會跟湯渣，有粟米、蘿蔔等，非常足料。食埋絕對夠飽了。 餃子全部大大隻，餡亦好足料，肥肉唔多。椰菜係爽脆嘅，食紫菜最怕啲紫菜洗唔乾淨有沙，但我食過咁多次都無發生過，我好放心買嚟食。對於芫荽愛好者嚟講，芫荽餃係不可不吃。芫荽係一樣好小器嘅香料，一隔夜味道會大減。呢個餃次次食親都有好濃嘅芫荽味，我非常滿意。 其實呢間舖嘅招牌菜係芝士粟米煎餃。不過我呢排要修身，只能遲啲先食了。