香港地 (已結業)

喺Popcorn Namco玩到肚餓就去咗對面好多人等位嘅香港地醫肚，原本以為只係普通一餐，估唔到有驚喜。頭抽乾炒M5澳洲和牛炒河粉 $62 出面普通乾炒牛河閒閒哋都要五十幾蚊，呢到加多幾蚊就有M5和牛食，雖然未係好高級，但比起普通嘅牛肉脂肪比例更加高 (fyi 澳洲M9大約等於日本A3)，都算抵食，而且河粉都有鑊氣，overall都好滿意。砂窩 · 窩蛋三蝦香菇炆飯 $72 超香口！三蝦分別係蝦球、蝦乾、蝦籽，成個飯滿佈蝦籽已經勁香，蝦乾又添鹹香，蝦球又夠彈牙，不得了。海皇素翅燉冬瓜盅 $118 本來以為香港地好似茶餐廳咁，估唔到連冬瓜盅都有，呢到採用素翅好環保，又可以過下口癮。入面仲有各種海鮮，冬瓜清甜，海鮮又夠鮮。整體足料又抵食，記得搵幾個朋友一齊share。濃朱古力沙冰奶 $38 個賣相好夠gimmick，價錢都合理，如果跟餐轉配會更抵飲，朱古力味唔會因為維他奶而溝淡，上面仲有粒粒，口感唔錯。紅豆沙冰奶 $38 紅豆搞爛哂，成杯散發濃濃紅豆味，配維他奶感覺都幾清新，沙冰又有口感又消暑，成個combination都幾創新。唔駛加一服務費，埋單2人約$320 (唔小心嗌多咗😛) 。