一汁一菜 (朗豪坊) (已結業)

疫情嚴峻下，晚市繼續禁堂食，放工後想食餐好嘅，唯有買外賣返屋企慢慢嘆，今日來到朗豪坊見到呢間和風料理店，主打日式濃湯相當吸引，天寒地凍下一於試下。餐廳以簡約和風木系裝潢，感覺舒適；餐牌主要有兩款餐可以選擇，我地揀左兩個咖喱飯餐。法式龍蝦濃湯 :龍蝦味好濃，奶油令湯入口更幼滑，配料有龍蝦肉、洋蔥、甘筍粒等，非常美味。和風蕃茄雞肉咖喱 :加入蕃茄嘅咖喱，入口微辣中帶酸甜，有好多雞肉，飯可以轉麵包或野菜沙律杯，適合食量唔大嘅女士。北海道產甜粟雞肉豆乳濃湯 :粟米湯一向係我嘅最愛，入口鮮甜，配料有雞肉、西蘭花及甘筍，非常豐富，飲完後又身體好暖和。濃香牛肉野菌咖喱飯 :相比起一般日式咖哩，味道較濃烈惹味，牛肉份量都幾多，煮得夠淋，配上野菌感覺好夾。油揚豆腐黑豚薑汁燒 :套餐加二十蚊可以追加一品料理，我地加左呢個黑豚薑汁燒，黑豚煮得夠淋夠入味，配上油揚豆腐及洋蔥，配飯食一流。簡簡單單的料理，為疫情下的寒冬帶來一點溫暖。